قوانين البلوت

الورق

32 ورقة: من السبعة إلى الإكة في كل نوع. الأنواع: سبيت ♠ وهاص ♥ وشريا ♣ وديمن ♦. أربعة لاعبين، كل اثنين متقابلين خويين، واللعب يدور لليمين.

الصن، والأنواع غير الحكم
الورقة	الأبناط
الإكة	11
العشرة	10
الشايب	4
البنت	3
الولد	2
التسعة، الثمانية، السبعة	0

الحكم (الطرنيب)
الورقة	الأبناط
الولد	20
التسعة	14
الإكة	11
العشرة	10
الشايب	4
البنت	3
الثمانية، السبعة	0

الترتيب من الأقوى بنفس الجدول. آخر أكلة (الأرض) عليها 10 أبناط، فمجموع الحكم 162 ومجموع الصن 130.

التوزيع والشراء

كل لاعب ياخذ خمس أوراق (ثلاث ثم ثنتين)، وتنكشف ورقة في النص. الشراء يبدأ من يمين الموزع.

الجولة الأولى

حكم: نوع الورقة المكشوفة يصير الحكم. وإذا ما أحد زاد عليك، تختار تكمّل حكم أو تحوّل صن.
صن: بدون حكم، ويتقدّم على الحكم. واللي قبلك في الدور له الأولوية ياخذ الصن قبلك.
أشكل: للثالث والموزع بس، وممنوع إذا المكشوفة إكة. صن، بس الورقة تروح لخويك وهو المشتري.
كوّش: إذا ورقك الخمس كلها سبعات وثمانيات وتسعات، تقدر تلغي التوزيعة.
بس: تمرّر.

الجولة الثانية (ثاني)

إذا الكل قال بس، تبدأ جولة ثانية: حكم بنوع غير نوع المكشوفة، أو صن (وينتهي الشراء فورًا)، أو ولا. وإذا الكل قال ولا، يعاد التوزيع.

المشتري ياخذ المكشوفة وورقتين، والباقين ثلاث ثلاث، فيصير مع كل واحد ثماني أوراق.

الدبل

قبل أول ورقة، يقدر خصم المشتري يقول دبل (×2)، فيرد المشتري ثري (×3)، فيرد المدبّل فور (×4)، فيرد المشتري قهوة: اللي يكسب الجولة ياخذ الصكّة كلها.

مع الدبل والفور يختار المدبّل مقفول (ما أحد يفتح بالحكم وعنده غيره) أو مفتوح. الثري والقهوة دايم مفتوح.

الصن ما فيه إلا دبل، ويُسمح فقط إذا كان أحد الفريقين فوق المية والثاني تحتها.

اللعب

أول من يلعب هو اللي على يمين الموزع. لازم تنزل من نفس النوع إذا عندك.

إذا انفتح بالحكم وخصمك ماسك: تكبّر عليه إذا تقدر.
إذا ما عندك النوع وخصمك ماسك: لازم تدق بالحكم، وإذا خصمك داق تكبّر عليه إذا تقدر.
إذا خويك ماسك وأنت آخر واحد: العب اللي تبي.
إذا خويك فتح وماسك وأنت الثالث: لازم تدق، إلا إذا فتح بإكة أو بأعلى ورقة باقية في النوع (إكة، وتنعلن تلقائيًا).
في الصن: إذا ما عندك النوع، العب اللي تبي.

سوا: إذا كان دورك تفتح وكل ورقك فائز أكيد، تقدر تقول سوا وتاخذ الباقي.

المشاريع

المشروع	الحكم	الصن
سرا: ثلاث ورقات متسلسلة	2	4
خمسين: أربع متسلسلة	5	10
مية: خمس متسلسلة، أو أربع شياب أو بنات أو أولاد أو عشرات	10	20
أربع إكك	10	40 (أربعمية)
بلوت: الشايب والبنت من الحكم	2	—

المشاريع تنعلن مع أول ورقة في الأكلة الأولى، وتنكشف في الأكلة الثانية. لكل لاعب مشروعين بحد أقصى، وما تتكرر الورقة في مشروعين.
الفريق صاحب أقوى مشروع ياخذ مشاريعه كلها، والثاني تسقط مشاريعه: الأربعمية، ثم المية المتسلسلة، ثم مية الأربعة، ثم الخمسين، ثم السرا، ثم الأعلى ورقة، ثم الأقرب لأول اللعب.
البلوت ينعلن تلقائيًا لما تنزل الثانية منهن، ودايم بثنتين ما يندبل. ويسقط إذا الورقتين داخل مية، أو وحدة منهن داخل مشروع ثاني.

الحساب

الحكم: الأبناط تقسم على عشرة، والخمسة تنزل (65 = 6، و66 = 7). المجموع 16.
الصن: الأبناط تقرّب لأقرب عشرة ثم ×2 ÷10، والخمسة تبقى (64 = 12، 65 = 13، 66 = 14). المجموع 26.
المشتري يكسب إذا جاب أكثر من خصمه أو تعادل معه (81 مقابل 81 للمشتري). وإذا خسر، تروح كل نقاط الجولة ومشاريعها وبلوتها للخصم.
مع الدبل والثري والفور: اللي يكسب ياخذ كل شي مضروبًا، والبلوت يبقى بثنتين.
الكبوت: اللي ياخذ الثماني أكلات ياخذ 25 في الحكم و44 في الصن، مع مشاريعه.
الصكّة على 152. وإذا وصلوا الثنين بنفس الجولة، الأعلى يكسب، ولو تعادلوا تنلعب جولة زيادة.

قوانين الجلسة

كل مجلس له طريقته، فالمضيف يقدر يغيّر قبل البداية:

لزوم الدق على الخوي: شغّال افتراضيًا (قانون البطولة).
الكوش: شغّال افتراضيًا.
الأشكل في الثاني: مطفي افتراضيًا (يسويه بعض أهل الرياض).
وقت الدور: بدون، 20، 30، أو 60 ثانية. اللي يخلص وقته يلعب عنه الكمبيوتر لين يرجع.

جرّبها ضد الكمبيوتر افتح طاولة للربع